අවුරෝරා

නාට්‍ය කලාවේ අපේ සළකුණ

ලෝකය රඟ මඬලකි. අපි එහි රඟන නළු නිළියන්ලු... ඉතින් රඟපාන එක අපි කාටවත් අලුත් දෙයක් නෙවෙයිනෙ. ජීවිතයේ විවිධ ජවනිකා රඟපාන මෙඩ්ඩන්ට නළුවෙක්ගෙ ජවනිකාවක් රඟපාන්න ලැබෙන කදිම අවස්ථාවක් තමයි "අවුරෝරා".

අවුරෝරාවලදි එක එක අධ්‍යයන වර්ෂවල නාට්‍ය, තරගයක් ලෙස එළි දක්වනව. වෙද පියසේ ඉගෙන ගන්න අයියලා අක්කලා නංගිලා මල්ලිලා තම තමන්ගේ රංගන හැකියාවන් අවුරෝරා වේදිකාවේ පෙන්නාවි.

මේ නව නිර්මාණ, වේදිකාවේ නාට්‍ය කලාවේ හසල දැනුමක් ඇති ප්‍රවීණ රංගශිල්පීන් විසින් ඇගයීමට ලක් කරාවි.

නළුකමට දක්ෂ අපේම සහෝදර සහෝදරියන් තිළිණ ලබාවි.
මේ හැම දේකටම වැඩියෙන් නාට්‍යයක් බලලා, නාට්‍යයක රඟපාලා අපි ලබන ආස්වාදය,ඒ සුන්දර මතකය අපි හැමෝගෙම ජීවිතය පුරාවටම මුවගට සිනහවක් ගෙන ඒවි. ඒ සිනහව අභියෝග ජයගන්න මහ පන්නරයක් වේවි.

නාට්‍ය කලාවේ අපේ සළකුණ

ඉතින් ඒ අත්දැකීම විඳගන්න, අපේම මෙඩ්ඩන්ගේ රඟසොබා දැකගන්න ජුනි 15 සවස 5.30 කේරි විද්‍යාලයේ හැකි වේවි.

අපේ පැදුර

එන්න... unplugged සංගීතයේ අසිරිය විඳගන්න...

සංගීතය කලාවත් එක්ක නිතර බැඳිලා තියෙන සුන්දර මාතෘකාවක්. අපි හැමදෙනාගෙ ම ආත්මයන් තුළ සංගීතය ඉතා සියුම් විදිහට හැංගිලා තියෙනවා.ඒ සැඟවුණු සංගීතය පරිබාහිරයට නියමාකාරයෙන් ඉදිරිපත් කිරීමෙන් තමයි, සාමාන්‍ය කට වහරෙන් කියනවානම් 'සංගීතකාරයෙක්' බිහිවෙන්නේ. අපේ මේ කලා සතිය සංගීතයට විශේෂ තැනක් දෙන්න හිතුවා.

ඒ නිසාවෙන් ම ප්‍රභාෂ්වරී ගී දැහැනට අමතරව අපි අපේ ම පැදුරක් එළිදක්වනවා.

සුභාවිත, මියුරු සත්සර රාවයෙන් හැඩවැඩ වෙන අපේ පැදුරේ ගී ගයන්නෙත්, වයන්නෙත් අපි අපිමයි.ඒ ලස්සන සත්සර රාවයන් තුල අතරමං වෙමින් ගී පද වැල් මුමුණන්නට ජූනි 14 සවස 6.30ට ශිෂ්‍ය පොදු විවේකාගාරයේදී දිග හැරෙන 'අපේ පැදුර' මහඟු ඉඩහසරක් සපයාවි.

Caged නාට්‍යය

දීප මංජරියේ දෙවැනි දවසේ, ඒ කියන්නේ ජූනි 12 වෙනිදා සාම්ප්‍රදායෙන් ඔබ්බට ගිය නැවුම් අත්දැකීමක් ශිෂ්‍ය පොදු විවේකාගාරයේදී දිග හැරෙනවා.ඒ 'caged' , නම් පර්යේෂණාත්මක නව්‍ය නාට්‍යකරණයේ අලුත් ම නිර්මාණයක්.
'caged' කියන්නෙ රාමු වලින් කො‍ටුවෙලා ජීවත්වෙන අපි වගේ ම මිනිසුන් ගැන අලුත් විදිහකට කතා කරන නාට්‍යක්. ආදරය, විවෘත සබැඳියාවන්, සාම්ප්‍රදායික විවාහයන්, සමලිංගිකත්වය, මානුෂිකත්වය වගේ සමාජයේ එක එක පුද්ගලයන් එක එක රාමුවලට කො‍ටුවෙලා කතා කරන මාතෘකාවන් කලාත්මක නිර්මාණයකට කැටි කරපු මෙය 'සාෆීර්' නම් නව පරපුරේ අධ්‍යක්ෂකවරයාගේ සාර්ථක වෑයමක්.
නළු නිළියන් දහ දෙනෙකුගේ රංගනයෙන් හැඩවුණු මේ නිර්මාණයේ අපූරු බව එහි භාවිතා කරන ඇඳුම් පැළඳුම් වලින් පවා මොනවට නිරූපණය වෙනවා. එකිනෙකට වෙනස් දර්ශණ පහක් භාවිතා කරන මේ නිර්මාණයේ ආලෝකකරණය, රංග වින්‍යාසය ආදී සියල්ලම අලුත් අත්දැකීමක් වෙන බව නම් කිසිම සැකයක් නෑ.
දේශීය හා විදේශීය දර්ශණවාර රාශියකදී පැසසුමට ලක් වූ 'caged' කොළඹ වෙද පියසේදී ජූනි 12 වනදින සවස 6.30ට ප්‍රදර්ශණය කෙරෙනවා.
විවිධත්වයෙන් පිරුණු, සාම්ප්‍රදායෙන් මිදුණු නැවුම් නාට්‍යයක රස විඳීම වෙද සිසුසිසුවියන්ට සොඳුරු මතකයක් එකතු කරාවි.

ප්‍රභාෂ්වරී ගී දැහැන...

ගී දැහැනට අපේ වෙද පියස සැරසුනේ මෙන්න මෙහෙමයි...

රෑ තුන්යම පුරා පැල් රකිද්දි පාලුව කාන්සිය තනිකම මකාගන්න අපේ ගැමියෝ ඉස්සර පැල් කවි කිව්වා. වස් දඬු රාවයක් එහෙමත් වැරදුනේ එහෙමත් වෙලාවකට. ඒ වගේම ඉඳලා හිටලා කට්ටිය එකට එකතු උනාම සර්පිනාවක් තබ්ලාවක් එක්ක බටනලාවකුත් පෑහිලා පොඩි පැදුරු සාජ්ජත් දැම්මා.
සොබා දහමත් එක්ක පෑහිලා හරි අපූරු දිවියක් ගෙවපු මෙයාලා ඒ වගේ දේවල් තුලින් හරිම අහිංසක, කලාත්මක සතුටක් ලැබුවා.
කාලයත් එක්ක පැදුරු සාජ්ජ සමාජයෙන් වියැකී යන්න වුණා. ඒත් එවන් දෙයකින් ලැබෙන සියුම් රස වින්දනය අපි කාගෙ කාගෙත් හිත් කොනක තැම්පත්වෙලා අදටත් ඉතිරි වෙලා තියෙනවා. හිත් තුල හැංගිලා තියෙන මෙන්න මේ සියුම් තැන අවදි කරන්න තමයි 'art එකේ අපි' ප්‍රභාෂ්වරී ගී  දැහැන නමින් 'පැදුරු සාජ්ජයක්' සංවිධානය කරන්නේ. 
ලාංකීය සංගීත ක්ෂේත්‍රයේ නූතන ගාන්ධර්වයන් ලෙසට අපි කවුරුත් ආස කරන ආදරය කරන,

• ඉන්ද්‍රාණි පෙරේරා
• එඩ්වඩ් ජයකොඩි
• චරිතා ප්‍රියදර්ශනී
• කීර්ති පැස්කුවල්
• රොඩ්නි වර්ණකුල

ගී දැහැනට අපේ වෙද පියස සැරසුනේ මෙන්න මෙහෙමයි...

   අපේ වෙද පියසට පැමිණ ගී ගයන්නට ආරධනා ලැබුවා..
එකිනෙකට වෙනස් වුණු ශෛලීන් කිහිපයක් ඔස්සේ ප්‍රභාෂ්වරී ඔබ හමුවේ දිග හැරෙනවා.
අපි කවුරුත් දන්න කියන සරත් විජේසූරිය මහැදුරුතුමාගේ මෙහෙයවීමෙන් සිද්දවෙන මේ 'පැදුරු සාජ්ජය' සෞන්දර්ය කලා විශ්ව විද්‍යාලීය වාද්‍ය වෘන්දයේ සුමියුරු සත්සර රාවයෙන් තවත් හැඩ වෙනවා.
වර්ෂ 2012ක් වූ ජූනි මස 11 වෙනිදා හවස 6.30ට සිසුසිසුවියන්ගේ පොදු විවේකාගාරයේ පැවැත්වෙන මේ 'පැදුරු සාජ්ජය' වෙද සිසුසිසුවියන්ගේ සිත් තුල නවමු සුන්දර මතයක් රඳවාවි.  

දීප මංජරී

මේ දවස්වල art එකේ අපි අලුත් ම වැඩක් කරනවා. අපේ අතීත සිද්දි ගැන ඉදිරි ලිපි වලින් බ්ලොග් එකට එකතු කරනකම්, මේ සිද්දවෙන අලුත්ම වැඩේ ගැන ලිපි පෙලක් ඉදිරිපත් කරන්නම්...

හැමදාම කාන්තාරයට හිරිපොද වැස්සක් නැති උනාට කාන්තාරයටත් වැහි වහිනවා. හැමදාම වහින වැස්සෙ අගයක් නැති උනාට ඉඳලා හිටලා හරි කාන්තාරෙ වැලිකැට අතරින් පොළොව සිපගන්න පතිත වන මේ වැස්ස හරීම ලස්සනයි, සුන්දරයි. ඒ වගේම නැවුම් බවෙන් පිරීලා. හැමදාම හිරු ‍රැස් වලින් හෙම්බත් වෙලා දුක් වින්දට මේ වැලිකැට කවදාවත් ම වියැකෙන්නේ නෑ. මේ පුංචි වැලිකැට වලට බලාපොරොත්තුවක් දෙන්න, ජීවයක් දෙන්න, සිසිලසක් දෙන්න ඉදලා හිටලා හරි වහින මේ වැස්සට පුළුවන්.
දීප මංජරී කියන්නෙත් කොළඹ වෙද පියසේ කලා සංගමයෙන් වෙද සිසුසිසුවියන් වෙත තිලිණ කෙරෙන, කාන්තාරයට ඉඳලා හිටලා වහින වැස්සට සමාන දෙයක්. සරළවම කිව්වොත් තනි පහනකට වඩා එළිය දෙන පහන් සමූහයක්, ඒ කියන්නෙ දීප මංජරියක්, කොළඹ වෙද පියසේ සිසුසිසුවියන්ට අමුතුම අත්දැකීමක් ලබාදෙන්නයි මේ වෑයම.
වෙනදාට අතරින්පතර වෙන art වැඩ කිහිපයක්, 2012 වසරේදී art එකේ අපි සත් දවසක් පුරාවට එක දිගට කල එළි දක්වනවා.ජූනි මාසෙ එකොළොස් වෙනිදයින් පටන්ගන්න මේ වැඩසටහන් පෙළගැස්ම මෙන්න මෙහෙමයි.

• 11 වෙනිදා 'ප්‍රභාෂ්වරී' ගී දැහැන

කලා මංගල්‍යට අපේ වෙද පියස සැරසුනේ මෙන්න මෙහෙමයි...

• 12 වෙනිදා 'Caged' නාට්‍ය

• 14 වෙනිදා 'අපේ පැදුර'

• 15 වෙනිදා 'අවුරෝරා'

• 13,14,15 දිනවල දිවා කාලයේ රසවින්දනාත්මක කතිකාවතක්.

දීප මංජරී කලා එළියෙන් සිසුසිසුවියන්ගේ වෙද පියසේ දිවියට අලුත් ම පැහැයක් එක් කරන්නයි අපේ මේ වෑයම.

මේ එක එක වැඩසටහන ගැන විස්තර ඉදිරි ලිපි වලින් ඉදිරිපත් කරන්නම්...

ඇරඹුණු වැඩ...

කලා කටයුතු වල ආරම්භයක් විදිහට එවකට කලා සංගමයේ සිසු සිසුවියන් වෛද්‍ය පීඨ පරිශ්‍රය තුල මහගමසේකරයන් උදෙසා උපහාර උළෙලක් සංවිධානය කළා. ඒ වගේ ම වෛද්‍ය පීඨ ඉතිහාසයේ ප්‍රථම වතාවට සිංහල,දෙමළ,ඉංග්‍රිසි යන භාෂා ත්‍රිත්වයෙන් ම අංග ඇතුලත් විවිධ ප්‍රසංගයක් සංවිධානය කිරීමේ ගෞරවය හිමි වන්නේත් අපේ සංගමයටයි. "නිර්මාණ" යන නමින් බිත්ති පුවත් පතක් ආරම්භ කරපු කලා කවයේ නියමුවෝ, වෛද්‍ය සිසු සිසුවියන්ගේ නිර්මාණත්මක හැකියාවන් ඕනෑම බසකින් එලිදක්වන්නට ඉඩ හසර විවර කර දුන්නා. ඒ වගේම ඔවුන් එම වසරේදී ම නව කායවිච්ඡේද අංශයේ දේශනාගාරයේදී සම්මානනීය චිත්‍රපට උළෙලක් ද පවත්වා තියෙනවා.


1975 න් පසු මේ දක්වා වසර 30කටත් වැඩි කාල පරාසයක් පුරා කලා සංගමය පිලිබඳ වෙනත් කිසිදු තොරතුරක් හෝ වාර්තාවක් සොයා ගැනිමට අපි සමත් උණේ නෑ .ඒ නිසාවෙන්ම කලා සංගමයේ ඉදිරි ගමන සනි‍ටුහන් කිරීමෙ වැදගත්කම අවබෝධ කර ගත් අපි වාර්තා පොතක් ලේඛනගත කිරීමේ වටිනා කාර්යය  2007 වසරේ සිට ආරම්භ කළා. ඒ තීරණයේ තවත් ඉදිරි පියවරක් විදිහට  2012 අවුරුද්දෙ ඉදන් කලා සංගමය මේ විදිහට බ්ලොග් අඩවියක් විදිහටත් එලි දක්වනවා.


වෛද්‍ය පීඨ කලා සංගමයේ අක්මුල් සොයා ගිය ගමනේදී අපට නොමසුරුව සහය ලබාදුන් අප සංගමයේ ආරම්භක සභාපති වෛද්‍ය කමලදාස මහතාටත්, ආරම්භක ලේකම් වෛද්‍ය මහාචාර්ය සරෝජ් ජයසිංහ මහතාටත් අපේ හද බැති ස්තුතිය පුදකර සිටිමු.                                                                                                                             

ආරම්භය...

මුළු වෛද්‍ය පීඨයම ඉංග්‍රිසියෙන් ලියන්නට, කියන්නට, උගැන්මට මෙන්ම කථාබහටද හුරුව සිටි කාලයක වෛද්‍ය සිසු සිසුවියන්ට සිංහලකම වගේම අපේකම හඳුන්වාදීමේ අරමුණින් කලා සංගමය 1975 වර්ෂයේදී බිහි වුණේ 'කලා කවය' යන නාමයෙන්.මහත් බාධක කම්කටොළු මැද්දෙන් මේ උඩුගං බලා යෑම  ආරම්භ කිරීමේ ගෞරවය හිමිවන්නේ එවකට වෛද්‍ය සිසුන් ලෙස සිටි, ආරම්භක සභාපති, චර්ම රෝග විශේෂඥ වෛද්‍ය කමලදාස මහතාට, ආරම්භක ලේකම් මහාචාර්ය සරෝජ් ජයසිංහ මහතාට හා ආරම්භක කණිෂ්ඨ භාණ්ඩාගාරික, ළමා ශල්‍ය වෛද්‍ය විශේෂඥ රන්ජන් ඩයස් මහතාටයි.
කලාකවයේ උපදේශක මණ්ඩලය විදිහට මහාචාර්ය නන්දදාස කෝදාගොඩ මහතාත් මහාචාර්ය කාලෝ ෆොන්සේකා මහතාත් වෛද්‍ය නාරද වර්ණසූරිය මහතාත් නිරතුරුවම සහය ලබා දුන්නා.
ඒ වගේම එවකට වෛද්‍ය සිසු සිසුවියන් ලෙස සිටි වෛද්‍ය ආරියසේන එල්. ගමගේ මහතාත් වෛද්‍ය සරෝජා සිරිවර්ධන මහත්මියත් වෛද්‍ය බී. සෝමරත්න මහතාත් කලා කවයේ ආරම්භක සාමාජික සාමජිකාවන් විදිහට එහි ඉදිරි ගමනට දිරි දුන්නා.

අද වගේම එදත් කලා සංගමයේ ප්‍රධාන අරමුණ වුණේ වෛද්‍ය පීඨ සිසු සිසුවියන්ගේත් ආචාර්ය මණ්ඩලයේත්  කලා හැකියාවන් ඔප් නංවමින් ඉදිරියට ගෙන යෑම වගේම ඔවුන්ගේ රස වින්දනාත්මක ශක්තිය දියුණි තියුණු කිරීමයි.